Binuang uyamot ang konsepto sa creatio ex nihilo
dili mahimo kun imposible ang creatio ex nihilo nga buot ipasabot "pagmugna gikan sa wala"
1. pinasunod sa gumaranong panabot, "walay wala nga anaa kun ang wala gani dili gayod mahimong anaa"
2. pinasikad sa pisika, misupak kini sa unang balaod sa termodinamika
sumala pa sa usa ka ang teyista nga nagsunod sa klasikang o kukaraang griyegohanong pagsabot sa diyos, mahimo kuno sa diyos ang tanan apan matod usab kanila dili usab makabuhat ang diyos og mga kasukwahian sa lohika/pangatarongan
pananglit, ang 2+2 dili gayod mahimong motumbas sa 5, dili mahimong wad-on sa diyos ang iyang pagkadiyos ingon man nga dili siya makabuhat og bug-at uyamot nga bato nga dili nila mahimong aswaton.
nan tataw gayod nga may kinutoban ang diyos sulod sa lohika. wala gayoy kawalaan sa kahulogan niana daan busa dili gayod kana mahimong usa ka butang nga anaa sanglit sukwahi kana sa lohika.
ug tungod giisip sa teyista nga axiom (kun usa ka masukaranong katinuoran) ang diyos, nga usa ka dumalayong pagkaanaa, nagkahulogan gayod nga gimugna sa diyos ang lukopngatanan gikan sa iya mismong kaugalingon. Mihaom kini sa emanasyonismo (ang pagtuo nga ang lukopngatanan nagatubod mismo gikan sa diyos) ug panteyismo (ang pagtuo nga ang diyos mao ang mismong lukopngatanan) busa atong mapangataposan nga ang lukopngatanan gama mismo sa diwa, uyok kun pagkamao sa diyos.
Malimbongon gayod ang kadaghanan sa mga apolohistang teyista, ipasumangil nila ang lohika aron makalusot sa suliran nga dili mabuhat sa diyos ang tanan samtang moingon dayon sila usab nga ang diyos labaw ug saylo pa sa lohika. Giilin-ilinan ra nila ang lohika kon kanus-a mouyon kun mopabor kanila.
- Arjuna Dalakilat's blog
- Login or register to post comments
Comments
Ikaduhang pagpanghimakak
Akoa na kining gipanghimakak ug gitulisok ko na pag-ayo ang tanan nimong mga pagbatok. Dili mo malikayan ang dakong gumunhap agi niining 3 ka bitik nga gibutyag ko kanimo ug sa makausab wala pa gayod kini mapanghimakak sanglit gihambin niini ang kamatuoran pinasubay sa lohika.
Giduso pa nimo ang katarongan nga nanagsunod lamang nga pagkahan-ay sa panahon ang "ex nihilo" nga napahitabo da human sa kawalaan, nga lawos na man intawon ni nga argumento nga sukwahi kaayo sa alamdagong panabot sa panahon.
Sa pagkutlo pa sa banggiitang haniti nga si anhing Mdnon. Stephen Hawking: "ang pagpangutana kon unsay una pa sa Dakong Pagbuto maingon da sa pangutanang unsa bay amihanan sa kinaamihanang tumoy sa kalibotan. Kay usa lamang ka bagad nga kinaiya sa atong lukopngatanan. Nan kon wala kanay kawanangan, kabtangan kun pulog, wala usab kanay taknaan nga moihap.
Busa dili gayod mahimong maaduna ang pagkahanay sa panahon kon wala pa lingoy takna kay tungod pinasikad niana wala gayod ing pagkatapos liwas sa "pagkawala". Wala may kasaysayan ang kawalaan, wala kini adlaw, bulan, katuigan kun bisan unsa pa man nga sukod sa panahon busa usa lamang ka tuwad-balintong nga pamulong ang giingong "katin-awan" ni Manoy Tomas.
Dili unta ka maggama-gama og imohang pahoy kay tungod nagkalisod ikaw og lumpag sa akong mga pangatarongan. Kon buot gayod nimo maarang kaayo kitang magpahigayon og usa ka tanol nga panaglantugi kun debate aron atoang masukod kon asa gayod kutob ang sukwahi nimong pagpangatarongan.
Ug sa pangpanapos, wala pa gihapon ka makapasundayag kun makapagpasabot sa kalahian sa kabtanganong paghinungdan (material cause) ug masangpotong paghinungdan (efficient cause).