O Santo Niño balaang bata nga gisimba,
Sa mga sugboanon Ikaw usa ka gasa.
Ikaw among tigpanalipod nga labing gamay,
Ikaw sama sa tubod, ang gugma modagayday.
 
O kaluoy, kab-ota ang among kasingkasing,
Pasaylo sa mga sala, among panalangin.
Ang agianan nga nagtultol sa Amahan,
O Emmanuel, hupaya among kagul-anan.
 
Kay ikaw lang ang makaalim ning kayutaan,
Sa dugo mong giula among pasalamatan.
Ug kadtong sa Bethlehem ang nakitang kahayag,
Sa pasungan imong pahiubos gipadayag.
 
O batobalani, nangayo kami og grasya,
Aron masagubang ang hilabihang kadako,
Nga mga suliran ining panahona.
Hinaot nga ang imong dagway makita namo.